Nieuws
Foto's
Artikelen
Componenten
Applicaties
Kleinkunst

Kleinkunst: Onnozelen brol

Onnozelen brol (Willem Vermandere)

G' hebt van al da'j maar kunt peizen op de gekke wereldbol heel veel schone en edele dingen maar veel onnozelen brol op nen velo zonder wielen pedaleer j'u rank en slank uw bloot vel laat je bronzeren op de superzonnebank en zo draait hier de commerce, de kultuur is van geen tel joggen, skaten, surfen, fietsen, bekend merk en duur model 't is daarom da'k dikwijls zegge, op de gekke wereldbol hè'j veel schone en edele dingen maar ook veel onnozelen brol ...de wereld zit vol...onnozelen brol Ieder jaar were in Ieper, vierentwintig uren lang zijn al d'automaniakken were los uit het gevang alle duvels zijn ontbonden in ons lieflijk heuvelland lijk in 'n oorlog van veertiene, leperiet en moord en brand en zo draait hier de commerce, de moraal is van geen tel vlamt de Kemmelberg naar de kl.. heel de wereld maar na'd'hel 't is daarom da'k dikwijls zegge, op de gekke wereldbol hè'j veel schone en edele dingen maar ook veel onnozelen brol Groot gevaar voor Salmonella, zwemmen in zee zeer ongezond te veel pissers te veel kakkers, d'r drijft daar ook van alles rond dus in 't aquapark gaan ploeteren, een opgeblazen glazen kot het noordzeestrand met watervallen, da's 't ultieme kamelot en zo draait hier de commerce, propere zee is van geen tel de speculanten doen goei zaken, maar misdadig is het wel 't is daarom da'k dikwijls zegge, op de gekke wereldbol hè'j veel schone en edele dingen maar ook veel onnozelen brol Als de schone maand van Meie, d'akkers met jong groen bedekt komen spuitkarren gereden tegen onkruid en insekt boerkes zet uw kranen open dat uw zaaigraan goed rendeert God die alles hier doet groeien wordt deur Bayer g'assisteerd en zo draait de commerce, d'aarde later is van geen tel ons kinders komen straks ter wereld met gebubbeld kiekevel 't is daarom da'k dikwijls zegge, op de gekke wereldbol hè'j veel schone en edele dingen maar ook veel onnozelen brol Om mijn zorgen te vergeten, kijk ik 's avonds Vee-tee-em ik geraak direkt in alle staten van Goedeles zwoele stem de schoonste prijzen kan je winnen en de rest die koop je maar een roste pruike voor op je kletskop, 'n scheermachien voor j'okselhaar en zo draait hier de commerce, 't echt geluk is van geen tel konsumptieslaven aller landen, die reklame is kommer en kwel 't is daarom da'k dikwijls zegge, op de gekke wereldbol hè'j veel schone en edele dingen maar ook veel onnozelen brol Laat mij nu maar beter stoppen, met mijn pessimistisch lied van die schone en edele dingen, waarom zing je daarvan niet dat zijn de bloesems aan de bomen, dat is 't blij veugelgezang dat is dat keerksen op de tafel, dat is dat bloemk' op het behang in geen winkel kan je't kopen, geld en goud hier van geen tel dat is de glimlach van m'n liefste, dat is ons vrolijk kinderspel 't is daarom da'k dikwijls zegge, op de gekke wereldbol hè'j misschien wel veel onnozele dingen, maar van 't schone zit ie vol